“Festa cu l’amici” - di Santo Grasso

Arsira, quattru di li megghi amici,
a la me casa ‘i visti prisintari.
– Biddazzu! Salutamu, chi si dici?
Chi nenti hai quarcosa di mangiari?

– Carusi…chi vuliti? Vista l’ura,
c’è pocu di putiri priparari:
vi pozzu dari anticchia di virdura,
dànnici ‘u tempu pi si scungilari;

quattru alivuzzi e ‘npocu ‘i picurinu
di chiddu vecchiu, beddu ciàurusu,
ddocu c’è ‘nbuttigghiuni cu lu vinu
di chiddu forti, russu e ginirusu.

– Ma quannu mai! Stasira si fa festa!
A modu di li ricchi! Chi ti cridi?
Lèvitilla ‘a virdura di la testa:
lassa fari a l’amici, nun ti fidi?

Talìa ccà, talìa tuttu stu pisci!
Piscatu cu li riti ‘nta lu mari,
ti fai cunvintu? Fa nun lu capisci?
Lesti! Dàmini versu a priparari!

– Signuri mè, ma vi lu ‘mmaginati
chiddu ca succidìu nni la nuttata?
Padeddi e cazzalori pi frittati
e pi la pasta, pronta la pignata.

Sutè in quantità di frutti ‘i mari,
li masculini cu limuni e l’ogghiu,
ostrichi, cannulicchi e fasulari,
li rizzi, capisanti e purpu ‘i scogghiu.

Spaghetti cu li vonguli viraci,
li còzzuli ‘i Missina gratinati,
spiguli beddi grossi nni la braci,
li trigghi e mirluzzeddi ‘nfarinati.
Certu ‘un putìa mancari ‘u pisci spata,
astici, scampi e lu jàmmiru riali
e poi pi cumplitari la mangiata
quattru aragosti e anticchia di caviali.

L’abbiviraggiu? Chiffà mi lu riordu!
Forsi c’hera schampagni, ‘i marca fina!
Però spittati… prima ca mu scordu,
c’è ‘na buttigghia ccà, ancora china!

Ora la rapu e assemi a tutti pari,
brindamu, e penzu ca nun c’è bisognu,
di ràpiri la vucca pi spiegari,
ca tuttu chistu ha statu sulu ‘nsognu!

Primu c’ognunu fa lu so cummentu,
vulissi diri a cu’ mi sta liggènnu
ca da me puvirtà nun mi lamentu:
lu picca basta, ‘u chiù nun lu pritènnu;

anzi mi rudu, ca lu munnu ‘nfami,
nun senti nuddu sonu di campani,
ca tanta genti mòrunu di fami
pi nun avìri sulu un tozzu ‘i pani.